Formennska Íslands í Norrænu ráðherranefndinni á árinu 2009

Norrænu ríkin skiptast á um að fara með formennsku í Norrænu ráðherranefndinni og leiða starfsemina eitt ár í senn. Á árinu 2009 kemur það í hlut Íslendinga að gegna formennsku í nefndinni.

Yfirskrift formennskuáætlunar Íslands er Norrænn áttaviti. Í fjórum undirköflum er gerð grein fyrir helstu áherslumálum, en rauður þráður er að stórefla skuli rannsóknir og nýsköpun, ekki síst á sviði orku- og umhverfismála. Einnig er verndun hafsins eitt af áherslumálunum svo og gerð vákorts fyrir Norður-Atlantshafið.

Stefnumiðin eru undir fjórum meginþemum:

• Norrænn aflvaki
• Styrkur Norðurlanda
• Svar við loftslagsvanda
• Hnattvædd Norðurlönd

Sjá pdf-útgáfu af formennskuáætluninni í heild sinni.

Norræna ráðherranefndin er samsett úr 10 ráðherranefndum fagráðherra. Hún ber ábyrgð á norrænum rannsóknarverkefnum, stofnunum, starfsemi norrænu upplýsingaskrifstofanna, alþjóðlegum samningum og sáttmálum.

Sjá bækling um Norrænu ráðherranefndina

Íslendingar gegndu síðast formennsku í Norrænu ráðherranefndinni á árinu 2004 undir yfirskriftinni Auðlindir Norðurlanda.