Fréttir
Samstarfsráðherrar sjósetja sjö ný hnattvæðingarverkefni
Samstarfsráðherrar Norðurlanda ákváðu á fundi sínum í Stokkhólmi 28. október að hrinda úr vör sjö nýjum verkefnum í svokallaðri hnattvæðingarvinnu sem hófst fyrir tveimur árum. Verkefnin eru á sviði menningar og skapandi greina, heilbrigðis og félagsmála, vistvænna samgangna og bygginga, vísinda og nýsköpunar. Meðal annars stendur til að stórefla samstarf um notkun upplýsingatækni í vísindum (eScience) og leggja grunn að nýsköpunaráætlun sem á að styrkja rannsóknir í orknunýtni og upphitun húsa án koltvísýringsmengunar. Þá á að verja fjármunum til að knýja fram nýjan alþjóðasamning um notkun kvikasilfurs, en Norðurlönd ætla að beita sér fyrir því að alþjóðlegt samningaferli hefjist á næsta ári og ljúki á árinu 2013. Á síðastliðnum tveimur árum hefur að áskorun norrænu forsætisráðherranna þrettán hnattvæðingarverkefnum verið hleypt af stokkunum í Norðurlandasamstarfinu og miða þau öll að því að bregðast við loftslagsvandanum og efla samkeppnishæfni Norðurlanda.
Katrín Jakobsdóttir stýrði fundi norrænu samstarfsráðherranna á Norðurlandaráðsþingi í Stokkhólmi þar sem ákveðið var að verja jafnvirði 33,9 milljónum danskra króna til nýrra verkefna. Hún segir hnattvæðingarvinnuna endurspegla mikinn metnað í norrænu samstarfi.
“Það er fagnaðarefni að öll fagsvið Norrænu ráðherranefndarinnar taka nú þátt í hnattvæðingarvinnunni með framsæknum verkefnum. Nýju verkefnin ná líka til menningar og skapandi greina sem löngum hefur verið þungamiðjan í samstarfinu og nú stendur til að stórefla menningarútflutning og kynningu á norrænum menningarafurðum í hæsta gæðaflokki. Þar með er byggt ofan á eldra verkefni sem miðar að því að styrkja hönnunar- og listgreinar og kynna Norðurlönd sem miðstöð fyrir hágæða sköpunariðnað.
Íslendingar fara með formennsku í Norrænu ráðherranefndinni á þessu ári, en um áramótin taka Danir við. Formennskuáætlun þeirra var kynnt á Norðurlandaráðsþingi síðdegis í dag. Í henni er tekið mið af hnattvæðingarstarfinu og mörgum verkefnum sem Íslendingar hafa hleypt af stokkunum á þessu ári. Þannig ætla Danir líkt og Íslendingar að setja Vestur-Norðurlönd, verndun hafsins og málefni norðurslóða í forgang og hafa þeir falið Grænlendingum og Færeyingum umsjón með þeim málaflokkum á formennskutímanum.
